Game Theory ：投資博奕論（二）

巴黎：

上篇有關博奕文章的Like數特多，估唔到呢類戰爭文，女仔也啱，今日我就寫多一篇，如果認為啱睇，就給一個Like。

唔知點解有咁多人把悲劇投機客利弗摩作為個人偶像，筆者在此提醒新手，把一些悲劇人物作為個人的Role Modelling，結局將會出現同樣的悲劇，呢D叫Law of attraction。後生仔可能想別人看到自己轟轟烈烈，不過若睇完下面場戰爭，你就唔會再夠膽想轟烈，寧願悶悶地賺錢。

這是筆者最喜愛的中國歷史上最淒美、最浪漫的戰爭，當然是以看故事的旁觀者角度，如果把旁觀者換成主角，我認為自己會頂唔順，或會選擇一刎謝天下。

中國之所以今天版圖如此大，其實要拜五胡十六國時候的外族入侵所賜。其中一個最重要人物就是前秦的符堅，他本身就是胡人的氏人，不過他㓕了凉（夷狄人）、燕和代兩國（鮮卑人）統一北方，把中國地域擴大，甚至較現代的中國西北更遠，所以呢段期間其實應該是五胡興華而唔係亂華。

不知朋友有無睇以當時做背景的天龍八部？還記得入面想復國那個慕容復、又或喬峯和呀朱的兒女情長否？

天龍八部己經寫得非常精彩，但真正的歷史卻過之而無不及，當中真的復了燕國的後燕慕容垂，是一個有血有肉的真英雄，佢打仗博奕的神乎奇技、談笑用兵，隨便掛幾個火把在樹上就把敵軍嚇退的出牌，令我看得如痴如醉。

說得太遠，講番符堅，歷史就是這樣，只差一點點符堅就能統一南北，當他事業達到頂峯之年，正是末頂的開始，一切離不開錯計博奕。

上一篇說孔明和曹操隔住條河的博奕，呢篇也是關於落水戰的博奕。成語草木皆兵、風聲鶴唳就是出自這埸大戰，下次當個股市草木皆兵時，閣下請回憶呢篇文吧。

話說前奏的符堅如日中天，親統一百萬大軍南下攻伐只有八萬軍迎戰的南晉，兩軍在淝水一河之隔對持，史稱淝水之戰。

如果你是符堅，你會怎打呢？

呢個問題其實等同如果你有資金，你會選擇投機定投資一樣。

博奕遊戲現在開始，對手提出一個要求，話既然你（符堅）唔敢渡河過來和我打咁無膽，你D兵又太貼住個岸邊，搞到佢過唔到岸，不如你後退些小，留一片空地，我就過河和你痛快打一場，問你肯唔肯。

Blog友唔好睇下文住，停下來諗諗如果你是手中有百萬大軍的符堅，對手只有八萬，佢要落水，你會後退嗎？

你是否在想，先後退，佢得八萬，引佢地落水，係條河中唔上唔落時就砌佢、放箭？

⋯⋯⋯⋯⋯⋯

嗱，假如你有任何一絲接受對方的建議的想法，就是投機，事實上你根本唔使理佢，如有百萬大軍，就用最傳統打法把五十萬兵分為左右兩翼下水拉開兩面，五十萬正面看形勢，對手是旦救一面你都可以中兵前進圍住佢來砌，孫子説，＂十則圍之＂，就是這意思，呢D就係正路，就好似無論個大市點牛點熊，你有百萬兵都要以最基本的PE、Yield、PB、借貸比選股。即係妖股有九百幾種，好股好買賣只得幾種，只要你揸住宗旨，咁對手係吹你唔漲，耐你唔何。你有耐性慢慢砌佢，佢就一定會瓦解。

但符堅卻心急想贏，以為有著數，百萬大軍1字排（亞拉伯1字唔係中國一字），唔等齊人慢慢擺陣，龍頭在灣仔，龍尾卻在維園，又唔通知全體人員會點退，退幾多步，求其找幾個頭目便下命令，即係唔睇財務數字以為錢多就亂買股。

係前面灣仔（岸前)那班兵當然知道後退係乜事，但是佢地一後退，後面銅鑼灣個班唔知你做乜，呢個時候又有一個有勇有謀的奸細＂朱序＂，佢帶著幾萬秦兵在差不多條龍的中間大叫＂秦軍己敗，快逃命！！！＂

中軍見前軍後退，又聽到自己的將軍（奸細）叫逃命，好自然就走，前軍見後軍人踩人逃命，羊群效應馬上出現，一百萬大軍就係咁十數分鐘內完全瓦解。

朋友，任你是投機客利弗摩又好，放你在這一百軍的驚恐亂走的大軍內，結果只會是被踩甩頭定踩甩腳、還是心口碎的分別。

似唔似早排上証突然大跌，內地的期貨炒家劉強被亂軍踩死？係咪想起都恐佈呢？

我相信任何一個持有成手垃圾、又無息派或幾拾幾百倍PE股票、大做槓桿的投機人，其實就是把自己置於一群會＂隨時＂失控的百萬大軍內，他的生命已經完全不是在個人的掌控中。在順境時佢看到一百萬兵對八萬兵，以為贏硬，其實只要是旦從不知處有人叫一聲，佢就會被踩死。

朋友或會以為符堅蠢，其實每日市場都有這麼多的蠢人，把呢D投機兵法當絕世武功來練。

利弗摩、內地期貨的黃強之死固然可惜、也是個悲劇，但在百萬投機的羊群中二人只是當一雙的數字而己。

不過有一D常人以為是不務正業的博奕，卻是十拿九穩，下星期六，22／8日下午2時至5時於銅鑼灣禮頓路119，2201—2203室青年拹會內，我和止凡兄合辦的工作坊中，我就會介紹一個地球上最成功的380萬倍的交易如何改變了價值投資法中傳統的Buy and Hold策略，如果你硬係覺得Buy and Hold唔多就手又找唔到原因，當天之後你就會明白，所以朋友千萬不要錯過，報名請whatsapp 65655883。

交易方面：

隻華寶國際呢年價格跌唔小，跌下跌下，跌到有8％Yield，但業績又無跌，所以買左D，大行亂嗡之際反而保誠加注至持股量超過5％。

華寶個ROE這幾年越來越低，其中主要原因是佢現金越來越多，現金較4年前多左倍幾，所以佢EPS增長變成追唔上，其實有36億現金，而總負債只有16億，是可以把多出來的20億用來派息或回購，EPS就可快速回升，ROE也能維持，而現在華寶PE唔夠6倍也是回購的好時機。