事格十年，世事在變，我也一路轉變。
從前我太執著財務數學同系統架構、模型化思考，今次再翻睇，印象最深就係芒格講：因為個世界從來就不是以某單一個模型去運行，唔同學科嘅底層模型，全部都要拎落來股票分析度用，包括生態模型、競爭淘汰模式、化學作用、物理臨界點……幾十個模型再加埋25個人類心理誤判，無論係用來睇分析員嘅判斷，定係拆解企業文化帶來嘅影響，諸如此類好多道理。千祈唔好做嗰種明明一滴膠水搞掂嘅事情，永遠像個鐵錘人，只識拎錘仔用砸來解決。
查理芒格成日掛係口邊一句說話：「話俾我知邊個位會死人，我就永遠唔行過去。」背後有兩層意思：第一，對分析員嚟講，做完分析心動想買之前，一定要諗清楚有冇漏咗重大負面因素，包括自己本身嘅心理誤判，會令自己輸大錢；第二，對企業本身嚟講，要睇到有咩隱藏負面因素係公司暗地度擴散，拖垮企業業績，甚至引發生存危機。
簡單講就係股票分析員要有逆向思維，企業管理層同樣都要有逆向思維，堵死所有會令投資者蝕錢、同埋令公司出事嘅所有可能性。
如果你仲未明白，我就拎騰訊同阿里做例子同大家講下。
而家愈來愈多大科企入局電子零售，呢個正正係芒格所講、達爾文適者生存嘅競爭生態。阿里阻止唔到，亦一直冇一套足夠有力嘅方法保住市佔率，我不禁懷疑管理層從來冇認真檢討過，海外擴展點解唔達預期？明明有拼多多出海做得咁好擺係面前，佢都學唔到也唔抄功課，只識用粗暴砸錢嘅方式。
人人都講AI有幾萬能，但係已經定型穩定嘅零售市場，阿里依然唔識用AI改善營運搶市場，淨係識大灑金錢硬闖。我心度諗：連你自己都唔曉得活用AI幫自己，你那些可能使用你Ai模型做零售行業嘅客戶，又可以對你有幾多期望？
管理層一邊拎住海量現金砸錢同現有零售玩家挑機，另一邊又係AI板塊狂砸資金，手頭好似幾萬億現金亂使，就係粵語講男人穿大褲浪短褲、亂咁揈錢，東邊開戰西邊開戰。成班管理層就好似鐵錘，見到任何問題都當係釘子亂錘，美團每一外賣單的完成成本都比你低，就算給你搶到一半外賣市場，你繼續玩就年年虧多過他一倍，不玩的話，美團只要定價在你剛剛虧本的價位，他因為成本較低也能年年盈利，你年年虧本又可以玩得幾耐，單單呢一點，已經令我質疑佢哋嘅逆向思維能力；我覺得如果張勇仲係主管零售業務，一定唔會好似而家咁操作。
阿里新任管理層完全睇唔到芒格所講沉著應戰嘅特質。
用返達爾文競爭生態嘅邏輯嚟睇，騰訊獨攬14億用戶，當年馬雲形容自己公司嗰句說話啱晒佢：拎望遠鏡都望唔到競爭對手。芒格話優秀管理層會不斷拓闊護城河，唔會安於現狀。騰訊經營多年累積400萬個小程序，等到AI代理普及嘅時候，就推出小微AI Agent 賦能和流量給小程序管理員，好大機會出現芒格講嘅物理臨界點，再加埋多項因素一齊疊加嘅效應。就算我高估咗AI Agent同小程序結合嘅潛力，都好易睇明白：騰訊想切入任何新市場，一開局就會有十四億用戶打底，都有機會觸發多因素疊加帶來嘅臨界爆發效果。
又我特別欣賞騰訊同微軟喺AI賽道上嘅布局思路，正正對應查理芒格嘅思考方式：假設發展同我哋預想唔一樣，萬一企業會因為過度投放AI造成資源浪費，又受市況轉差拖累爆發財務危機，我現在有沒有做戰略自保的Plan B，C？
以上全部，就係我重溫芒格本書之後得到嘅感悟。
最後，若按照Benjamin Graham的思路， 現價買入啊里然後靜待管理層停止零售價格戰，後財務利潤和股價回復，不失為一個機會，但按芒格的思路，現價買入一支有很寬的護城河的騰訊，避免很多騰出騰入的買賣，又有很多臨界點嘅正向催化劑潛伏和引爆的機會。
沒有留言:
發佈留言