2015年4月27日星期一

多情股客無情股

巴黎:

星期五匯豐收市前抽升去到73蚊多,收巿後倫敦再抽到75元,一眾財演馬上加入唱好軍團,說什麼80、90蚊指日可待。

筆者買股廿年,乜都唔識,只學識一樣叫不要和股票談戀愛,當然朋友可以依戀一支股票,但就要明白所愛慕的她未必遵守愛情遊戲的give and take規則,一旦支股只take唔give息便嗚呼了,所以如果朋友選擇繼續多情,咁手中把劍、D子彈就一定要無情,這才能避免失戀失財的痛苦。

要做到像小李飛刀既無情刀的例不虛發,對待股票最好方法就是要學股神話(實際原創係Graham),唔好當她是寶(石),要當她是雜價攤入面DCheap野,斤斤計較。

筆者不是潑Blog友冷水,過來人點會唔明蟹貨痛苦,且我一星期前還加入大家的行列下了10%資金注碼在獅子銀行,問題是我們是不能一廂情願。

怎樣斤斤計較呢?前一篇文計算匯豐2015年無再罰款純利應是1260億上下,如果計埋遷册可以減低稅項就再多60億盈利左右去到1320億,12倍市盈率就是1萬5千8百億,現價是1萬4千二百億,即正業乜都唔進步淨攪好遷冊、唔再被罰款就有大概是現價11%升幅約82元。

當然如果匯豐控股發奮圖強就唔止呢條數,要筆者自己發奮找多些選股也難,所以我都唔會要求跟我三九唔識七的上市公司主席能為我等小股東做到,故只要求交番上年的成績就算。

有人又會說,在大時代下只要求11%升幅是否過低,朋友,建行今天的PE仍然只是6.7倍,要成一年後才十二倍PE既匯控牛真係要排隊等等至得。

不過筆者只要求匯控5.5%派息,保住之前利潤就心滿意足,要求低的好處是只有驚喜,唔會激死。


10 則留言:

  1. 我又一次走甩了, 不過今次機會成本不算多...

    回覆刪除
    回覆
    1. 70後兄,匯控真係好難大升,走甩也不算什麼的。
      今早睇報紙,估唔到多個基金和我看法,買它不求升,但求不跌和收息,結果是大家一齊買來收息之下就谷起股價。

      巴黎

      刪除
  2. 巴黎有冇分析過SOHO中國? 由售變租,會不會是另一隻823? 現在5.5% 感覺吸引。

    回覆刪除
    回覆
    1. 無分析soho,好似好多債,有錢我寧願買多一兩手川河。

      巴黎

      刪除
  3. 莎莎 & 澳博派 息都不錯,跌到現價好想買來收息退休,巴黎兄有意見'嗎?

    回覆刪除
    回覆
    1. 我用固定資產回報率衡量過幾隻賭業股,金沙、永利等可算入競爭價值高,而澳博是中至低,雖然大家的價格都是中至低,我還是選永利。莎莎未有分析過,多謝介紹。

      巴黎

      刪除
  4. 實事求是,封了蝕本門,收著股息等驚喜,漂亮。

    回覆刪除
    回覆
    1. 個人在星期前買時,只想把組合的息增加,要一支股一個月糧,這策略也是受止凡兄啓發。

      巴黎

      刪除
  5. 標題似乎改為:

    無情股票多情客

    可能更好!

    回覆刪除
    回覆
    1. 多謝 Chi Liu提醒,我一於跟足古龍小說的次序。

      刪除