用Charles Munger嘅《窮查理寶典》評啊里和騰訊

轉眼芒格離開我們已經二年半，巴菲特也退休了，前一排再重睇一次Charles Munger嘅《窮查理寶典》，就算內容同從前完全一樣，但睇落好似睇緊一本新書，生出一種全新嘅理解同感覺。

 

事格十年，世事在變，我也一路轉變。

 

從前我太執著只兩個財務數學和系統模型思考，今次再翻睇，印象最深就係芒格講：因為個世界從來就不是以某單一個模型去運行，唔同學科嘅底層模型，全部都要拎落來股票分析度用，包括生態模型、競爭淘汰模式、化學作用、物理臨界點……幾十個模型再加埋25個人類心理誤判，無論係用來睇分析員嘅判斷，定係拆解企業文化帶來嘅影響，諸如此類好多道理。千祈唔好做嗰種明明一滴膠水搞掂嘅事情，永遠像個鐵錘人，只識拎錘仔用砸來解決。

 

查理芒格成日掛係口邊一句說話：「話俾我知邊個位會死人，我就永遠唔行過去。」背後有兩層意思：第一，對分析員嚟講，做完分析心動想買之前，一定要諗清楚有冇漏咗重大負面因素，包括自己本身嘅心理誤判，會令自己輸大錢；第二，對企業本身嚟講，要睇到有咩隱藏負面因素係公司暗地度擴散，拖垮企業業績，甚至引發生存危機。

 

簡單講就係股票分析員要有逆向思維，企業管理層同樣都要有逆向思維，堵死所有會令投資者蝕錢、同埋令公司出事嘅所有可能性。

 

如果你仲未明白，我就拎騰訊同阿里做例子同大家講下。

 

而家愈來愈多大科企入局電子零售，呢個正正係芒格所講、達爾文適者生存嘅競爭生態。阿里阻止唔到，海外市場擴展唔達預期，明明有拼多多出海做得咁好擺係面前，佢冇學也冇抄功課，仍然只用粗暴砸錢嘅方式。

 

人人都講AI有幾萬能，但已經定型穩定嘅零售市場，唔覺阿里運用AI去改善産品搶市場，淨係識大灑金錢硬闖。AI幫唔到自己，那些可能使用阿里Ai模型做零售行業嘅客戶，也別應有太高的期望。

 

管理層一邊拎住海量現金砸錢同現有零售玩家挑機，另一邊又在狂砸資金到Ai，好似有幾萬億現金亂使，東邊開戰西邊開戰。管理層像芒格說的鐵錘，見到任何問題都當係釘子亂錘。

沒有弄清美團每一外賣單的完成成本都比你低，就算給你搶到一半外賣市場，你繼續玩就年年虧多過他一倍，不玩的話，美團只要定價在你剛剛虧本的價位，他因為成本較低也能年年盈利，你年年虧本又可以玩得幾耐。

 

現在的阿里股價，好大程度反映新任管理層完全睇唔到芒格所講沉著應戰嘅特質和護城河的脆弱性。

 

用返達爾文競爭生態嘅邏輯嚟睇，騰訊獨攬14億用戶，當年馬雲形容自己公司嗰句說話啱晒佢：拎望遠鏡都望唔到競爭對手。芒格話優秀管理層會不斷拓闊護城河，唔會安於現狀。騰訊經營多年累積400萬個小程序，等到AI代理來到的時候，就馬上推出自家小微AI Agent 賦能和賦流量給各小程序管理員，好大機會出現芒格講嘅物理臨界點，再加埋多項因素一齊疊加嘅正向效應。就算我高估咗AI Agent同小程序結合嘅潛力，都好易睇明白：騰訊想切入任何新產品。一開局就會有十四億用戶打底，都有機會觸發多因素疊加帶來嘅臨界爆發效果。

 

又我特別注意到騰訊同微軟喺AI賽道上嘅布局思路，正正對應查理芒格嘅思考方式：假設發展同我哋預想唔一樣，萬一企業會因為過度投放AI造成資源浪費，又受市況轉差拖累爆發財務困難，我現在有沒有做戰略自保的Plan B，C？

 

以上全部，就係我重溫芒格本書之後得到嘅感悟。

最後，若按照Benjamin Graham的思路， 現價買入啊里然後靜待管理層停止零售價格戰，後財務利潤和股價回復，不失為一個機會，但萬一呢？但按芒格的思路，現價買入一支有很闊的護城河的騰訊，避免了很多騰出騰入的買賣，又有很多臨界點嘅正向催化劑潛伏和引爆的機會。