洗眼，索緊褲頭帶

巴黎：

最近小年、中年、老年、一星期、一日股神頻出現，一山還有一山高。

那邊廂一日最高102，最低17既股閃現，筆者唔覺意望到別人搵食，希望勿被殺人滅囗。

雖說筆者慣了色即是空，空即是色，2500倍市盈率的神奇股也當睇唔到，別人賺錢是別人本事，但比呢類強光閃得多，對眼已經唔多舒服，要洗洗休息才能睜得開。

另一邊廂，現在大市齊集各路人馬搶食，但此時卻仍有內銀又仍然偏低，正是暗湧明湧同現，各位Blog友都在同一沙灘游水，無可避免會湧下湧下，大家記得索緊褲頭繩，否則連條褲也被衝脱，一退潮就成光豬壯士。

股票方面：

想不到中海油收到這麽多朋友善意提點，於是筆者實是求是再計清楚。大致是若原油價在美元65元一桶，中海油企係度乜都照舊，純利會約是363-485億， 較2014年盈利小16.5%-48％，現市值5700億，是11.7一15.7倍，點解範圍咁大，因為過去佔7成生產的中國地區操作成本只是人民幣60／桶，而佔30％的海外就是102／桶，全100%海外生產就賺363億，用回70／30比例就賺485億＊。而隻Exxon現價PE是18－19倍，朋友不放心的話，就不要買吧，因為又唔係無野可買。

筆者這一注就當對沖加元（因為個人有加元需求）。

＊其實D財務總管工作就是計這類過去既死數，說給老闆知當中數字的關係，等老闆運用佢個人的魅力、魄力去佈局，達成生產比例的理想峰值，實現最大利潤化，叻和差的公司，遇到同一低潮期，賺錢多少是可以相差很遠。這亦是為何說筆者寧願比多少少也會購入ROA最勁的股票的原因。