2015年5月20日星期三

分析漢能⋯⋯你估我好得閒

巴黎:

筆者買股票最討厭見到既就是大筆的應收帳款,與及向銀行、債權人借下一大筆錢,
呢D公司即使話自己點巴閉,或揾支槍指著我,我都唔會買,而我對呢D股的評級是「垃圾」。

至於垃圾有無價值,它朝是否鳳皇,都唔會關我事,我亦無本事賺呢D錢。

之前筆者曾經花了一分鐘,然後馬上決定唔洗睇,不過前天Blog友問有關股息與價值投資法,我覺得自己的一分鐘可能新仔要攪好久才摸索到,所以就決定以漢能做個藍本去表達股息和價值投資法的関係,如果你明左呢篇文,以後就會很快過濾D垃圾。

1.公司賺既錢是否現金?

唔賺錢既公司不用看,賺錢既公司只有三處放錢,第一是銀行,第二是D錢未番還在應收帳,第三錢番左來但買了存貨。

2.D錢要多久才回來?

漢能2014年銷售為96億,應收又是96億,即係整年都未收錢。咁即係玩大到一千億都得,反正差不多都是関連母公司交易,又不用還。

3.存倉流轉天數?
2014年成本是41億,平均存倉是11.5億,一年轉3.6次,即是102天出貨,連同應收帳就要465天至收到錢,如果係生意都執左佢啦,又點值得花時間研究呢?

4.漢能的價值?
淨資產得205億,商譽80億,應收帳96億,其它乜乜乜資產15億,存貨6.6億,現金剛夠用來找應付賬,清盆剛剛好得個零頭。母公司還在蝕錢,欠銀行、公眾一褲都是,又邊有錢比香港漢能?
一場遊戲一場夢。
http://asianextractor.com/2015/04/24/揭开汉能资金链谜团/

⋯⋯⋯⋯

其實買股票本來以PE計算就得,就是因為有呢D垃圾股,所以我地才要現金盈利,要收現金派息,看現金流表。

而要證明一間公司賺錢唔係假,最好是它己連續派息20年,咁用買入股價一除以股息,便知大概的回報,呢D叫呀婆投資法,己經有幾拾年歷史。但唔係咁易撞到好股,撞到也未必便宜,所以就要去分析其它無這麼長派息歷史的公司盆數有無問題,重點如下:

5.每年稅後盈利是否等同多了的現金?
唔計借貸和融資下:
a.平均幾年都一樣,咁就證明盈利是堅實;
b.平均唔等於,咁要看看最近幾年的銷售和盈利是否較前幾年的銷售和盈利高,因為早幾年賺的部分現金若用來添置機器,變成資產,用之前唔見個舊現金乘以ROA就應該等於呢幾年多出來的盈利,今年的現金流也應該高過幾年前,條數就還原到了,也合普通常識。

6.有無借貸和融資攪複雜個現金流表?
好似我隻川河簡簡單單無呢D野,假的機會自然小,隻超大就有呢D野,漢能佢老母有很多,個現金流表一複雜我就無咁得閒睇。

7.現金流表中的關連企業?
公司唔借貸不代表無債,例如川河有間聯營公司,所以就要用公佈的聯營公司資產負債表去証明,但漢能無公布母公司的財務借貸,咁漢能的資產是否屬於它就打過問號,因為公司可以作到關連企業的成本如何細,應收如何大,自己點巴閉,但母公司卻蝕到扒街,如果一個人左手爛,你是不應投資在他的右手。


總結,一間公司可以作到個盈利100億,但係派息就是照妖鏡,因為嗰100億可以是紙板道具,但派息卻是要給公眾。我隻互太差不多年年賺幾多就派幾多,銀行還有大筆淨現金,這些人才正氣凜然。
呢D就是派息的重要,和為何要價值分析。



花左我20分鐘寫垃圾股既文,估唔到無買佢都蝕本:《







63 則留言:

  1. 巴黎兄造福大眾,功德無量呢

    回覆刪除
  2. 巴黎兄造福大眾,功德無量呢

    回覆刪除
    回覆
    1. 做福大眾太抬舉了,其實唔貪心自己唔識既就可以。

      巴黎

      刪除
  3. 誰做了沽空個條友發大達了:|

    回覆刪除
    回覆
    1. 呢D棚係要用錢疊,昨日兩億成交就推冧好明顯彈盡。
      沽空者發唔到達,因為對方係無錢的。

      巴黎

      刪除
  4. 多謝巴黎兄, 新手如我真係要睇好耐先明白, 多得巴黎兄出手相助, 呢篇文袋袋平安, 多謝晒
    小不點

    回覆刪除
    回覆
    1. 不容氣,呢D新手一學就會。

      巴黎

      刪除
  5. 巴黎兄是否看过以借贷来派息的股,以前我曾经买入一直股,盈利没问题,年年增长,公司不断扩充,
    年年派息,但最后公司倒闭,机械是假的,存货是假的。

    回覆刪除
    回覆
    1. 超大是其一,第6點可防止中招。

      巴黎

      刪除
    2. 齋睇派息冇意思, 要長期(say 15年)維持每股派息一年高過一年先有意思

      刪除
    3. redponza所然極是,亦是Ben Graham祖師既規條,
      如果不是逐年加股息既公司我都唔會花時間,
      所以基本上過瀘垃圾股是一秒一間。

      巴黎

      刪除
  6. 巴黎兄不會蝕本的,,
    在下給予熱烈的掌聲和祝福,,
    相信網友在這篇分享中得益不少,,
    我投資第一著重是財務分析,,
    因為公司可以騙人,,財務數字是最老實的,,
    一有疑點的公司通常真係不掂為妙,,
    至少可以避開唔怕連個吉都冇,,
    所以讀財務報表係好緊要的,,
    感謝閣下作一個好的示範,,
    你打大篇,,我就回大篇小小,,
    努力,,互勉之...
    cleverpeople...


    謝謝cleverpeople的支持,個人係唔喜愛和呢D垃圾有任何直接間接的接觸。
    人生美好的事情和股票太多有待我們發掘,無謂花時間在垃圾身上。

    互勉之!

    巴黎

    回覆刪除
  7. 對於我這等新手而言, 上述文章已有很多不是能即時理解的知識, 但確能讓我們能確實地掌握一點點竅門. 謝謝.

    回覆刪除
    回覆
    1. Holy,慢慢來吧,以後我會寫得更簡單直接。

      巴黎

      刪除
  8. 正!! 再早D講就救人無數了。

    回覆刪除
    回覆
    1. 70後兄,對垃圾我只係得「避之則吉」一招。
      大家攞去使吧!

      巴黎

      刪除
  9. Paris 兄, 我初步對互太做功課, 發覺該公司從2010年到2014年銷售及凈利潤增長較慢, 現價過$10, PB4倍幾唔算低, 想問大哥點睇佢既前景?

    Tom Kan

    回覆刪除
    回覆
    1. Tom Kan兄弟,你可以上網看兩點:1.他在大隓厰房的可生產最高產能;2.2014年的銷售總數量。你會驚訝互太的産能利用率可以去到接近100%,這解釋為何2014年增長較慢。
      互太越南的廠房今年七月會投入,2015、16年就會再展開新一輪增長,但你要留意首年越南厰未必能滿産,那些固定費用分攤到每一單位的成本就可能較高,影響純利率,但呢D只是短暫,要注意是越南廠的變動成本是否對版,如果因短期固定成本大而股價走低,反而是入市好機會。

      希望你努力加油分析!

      巴黎

      刪除
    2. 多謝Paris大哥賜教!

      Tom

      刪除
  10. 謝謝巴黎兄的分享,學到好多野。

    回覆刪除
    回覆
    1. RkwC後生可畏,其實現金收息和收租概念幾乎相同,難不到老弟!

      巴黎

      刪除
  11. 多謝巴黎兄,呢類疊棚拆棚真係令一般財商知識如我嘅人大開眼界,加埋d咩1480,真係害死人......又再警惕我唔好怕慢怕執輸,最緊要係做實務。

    回覆刪除
    回覆
    1. DW,懂得改善已經是精明人,加油!

      巴黎

      刪除
  12. Tony兄,你隻川河我本來早兩日排@0.48,點知爭一格入唔到,而家已大升上去!

    回覆刪除
    回覆
    1. 楚楊,0.48我也入不到,Blog友前己入唔小,搞到無人肯出貨。

      巴黎

      刪除

      刪除
  13. 這是好材料,我都想寫,但給你先寫了,哈哈。

    回覆刪除
    回覆
    1. 冩呢D垃圾其實是浪費時間,只是希望大家把焦點放在現金股息和現金流身上而已。

      巴黎

      刪除
  14. 巴黎兄:
    感謝巴黎只分享,只是短短幾點,就能作出這樣的分析,真令我這投資新手大開眼界。
    最近閱讀 The little book that beats the market, 未知書中所介紹的Magic formula 能否對此類股票作出如此的見解。自問沒有慧根,手持秘笈也未能運用個中的精髓。只記得書中作書不斷提醒要明白Magic formula 背後的意議。還望巴黎兄提點。

    投石問路人

    回覆刪除
    回覆
    1. Magic Formular當然唔會選到呢D垃圾,
      因為他的ROEV是非常離譜。

      我唔會對任何不買的股票有任何見解,只簡單「唔懂得」就算,費事浪費時間。
      巴黎

      刪除
  15. 請問巴黎兄,你博客里多次提到的yield值要怎麼計算

    回覆刪除
  16. 請問平均存倉11.5億是怎樣得來?

    回覆刪除
  17. 巴黎兄對抽出長地後的長和的投資價值有可看法? 謝

    回覆刪除
    回覆
    1. 但凡重組的公司都會是有後者和認真希望釋放價值,故通常都會上升,
      我個人前沒有研究長和,所以消息公佈後就反應慢,便沒有再跟進。

      巴黎

      刪除
    2. 巴黎兄說的“後者“是“後著“嗎?我覺得他變了一隻超級公用股。 謝

      刪除
    3. 我的後著無看得這麼遠,現在他把綜合企業和地産完全歸邊,市場對二者估值不相同,前者不會被拖下水,地產中收租和純發展一大筆債務的又不同估值。咁就會釋放己存在的價值。但我個人是不喜歡綜合企業,太複雜。

      巴黎

      刪除
    4. 他用長地借貸幾百億,卻用在長和上,像港燈一樣,李生的財技實在沒法看得透。

      刪除
    5. 看不透就很簡單地不看吧。

      巴黎

      刪除
  18. 巴黎兄,謝謝你的詳細解釋,令我這個新手獲益良多!

    回覆刪除
    回覆
    1. Sandy ,這些基礎常識合乎常理,因此和態度中正的新手好啱 Channel,
      也好易吸收,加油!

      巴黎

      刪除
  19. 朋友問親都係呢類股,勸得多口都臭,好似阻人發達。不過小弟父母用血汗錢買的東宁系,連號碼都註消埋,惨!

    回覆刪除
    回覆
    1. 我完全理解感受。寫了6、7年Blog,被投機Blog主笑過"假"值投資,當年自己功夫未到家,在眾人面前扒街,也怪不了誰。
      現在有緣就說兩句,唔啱聽既亦唔會大過認真,人地批評話撞彩,耻笑我的選股也無所謂。

      受高人指點,要讓人相信自己唯一的方法就是自己先賺錢,還要長期個隻。既然別人想死,去不該去的地方,我地除了成全他外有乜符。

      刪除
  20. 謝謝巴黎兄分享!

    動向3818之前有幾年狂塞分銷商, 做到條數好靚, 唔係最後爆煲都唔知奶野...

    想請教巴黎一下, 可否用以上7點避開類以前動向的公司?

    回覆刪除
    回覆
    1. 佢地D貨一出門就變了應收帳,但其實係可以退回,即應收帳其實是倉存寄賣,銷售就有問題。用上面七點當然可以避開。

      巴黎

      刪除
  21. 巴黎兄, 想請教第5點係指用淨利同cash flow from operation + cash flow from investing activities比較嗎?

    回覆刪除
    回覆
    1. 是的,但要留意表內的細數有無道理。

      巴黎

      刪除
  22. 是我就會很短視地不花二十分鐘寫漢能,還是巴黎兄高明。如大股東懂得挾空倉再抵押再反手沽,更高。

    回覆刪除
    回覆
    1. 狗股小子,垃圾既野我只會直行直過,無論大股東用乜招,都贏唔到我一毛,因為我係唔會理佢做乜,呢D只會叻到D貪心的人。

      巴黎

      刪除
  23. 謝謝分享!巴黎兄浪費了二十分鐘,讀者們卻獲益良多:)

    回覆刪除
  24. 多謝巴黎兄的20分鐘。有些人就喜歡賭博, 分不清投機和投資分別的人。就怕他們多花20年也不明白。

    回覆刪除
    回覆
    1. 是的,了唔了解真是要講緣份。

      巴黎

      刪除
  25. 感激呢20分鐘!學到野,同埋笑死左。

    回覆刪除
    回覆
    1. Mandy,也希望妳們愉快中有得著。

      巴黎

      刪除